بريدك يا بلـــــــــدي

الجعلي الثلاثاء ديسمبر 04, 2007 9:38 am

وحات ريدا غزلنا غزل
من دم القلوب الشاربة من طين الجروف
وحات ريدا نضمنا عقود
من نفس حرقانه بي نار الحروف
وحات شوقا عظيم كامن
محفور حفر جوا الضلوع والجوف
وحات أرضك
وحات عزك
وحات مجدك
بريدك أنت بس وحدك
وما في غرام أكون بعدك
بريدك أنت يا بلدي
بريد ناسك بريد أهلك بريد أرضك
بريدك أنتي يا السودان
أنت أمان أنت حنان وأنت جنان
وأنت العزة وعزة الإنسان
هواك ملكني يا السودان .
شلتك جوه حدق العين
وغنيتك وتر رنان
ومن خضرة بواديك الخضار ألوان
ومن سمرة بناتك ديل نغم فنان
ومن هيبة رجالا فيك للتاريخ بقت عنوان
ومن مدن صاحيه طول الليل
ونغم شادي أترنم
أعيد الكان حليل الكان
وفوق ضفاف نيلك
تتوسد قرانا جروف
تفيض بالخير كما الفيضان
ونار توقد وصوت حيران
أرتلوا وأقروا في القران
وفي تكبير وفي تسبيح لامن أسمعوا الأذان
وأنا مساهر في ليل الغربة متوشح سواد ليلك حرف
وجوفي من العذاب مليان
وكاتب نهار نيلك حرف مرصع بالدرر ألوان
عشان بهواك يا بلدي
عشان بهواك يا ريدي
ما أنت الفال وأنت السيرة والشبال
وجرتق عريس فرحان
ألمع في جبينو هلال
أنت الفال ومطراً شال وخوراً سال
وشجراً مالوا ليلا طال
بريدك أنت رغم الحال
أنت الدنيا وما في دنيا من غيرك
أنت النوبة والفادنية وقت أظهر نجم ليلك
أنت الحب للبهواك
أنت عذاب لعاداك
وتاريخك مسطر فوق نهر نيلك لوح مرسوم ودرر منظوم
يحكي عن أصالة الإنسان
وعن ألفات وعن الكان
شلناك أمانة في الأعناق مثل ناس حمزة والعباس
أنت فرح إنت ترح وجمال أحساس
أنت النيل قسم أرضك
وعاشت على ضفافو أجناس
بريدك أنت يا الســـــــــــــــــــــــــــــــودان
بريد ليلك بريد نيلك لمن أحضن أم درمان
كم أشجت خيال شاعر
وبيها أترنم الفنان
بريدك يا
الســـــــــــــــــــودان
القصيدة دي تاليف والدي العزيز ربنا احفظوا

**الذئب الاسود** الثلاثاء ديسمبر 11, 2007 6:38 am

مشكووووووووووووووووووور يا الجعلي عالحماس

وتقبل مروري السريع

تحياتيــ

cheers

في انتظار جديدك

بريدك يا بلـــــــــدي

بريدك يا بلـــــــــدي

رد: بريدك يا بلـــــــــدي